Gwamna Badaru Na Jihar Jigawa Ya Samu Lambar Yabo

Gwamnan Jihar Jigawa Alhaji Muhammad Badaru Abubakar a yau ya karɓi shaidar (lambar) yabo daga Ƙungiyar yaɗa manufofin gwamnati ta hanyar Sabbin Kafafen Sadarwa na Zamani na Shiyyar Arewa maso Yamma, bisa la’akari da ƙoƙarin sa, jajircewa da yunƙurin sa na kare martabar dimokraɗiyya, ba wai a jihar Jigawa kaɗai ba, har ma da Najeriya baki ɗaya.

A sanda yake miƙa masa wannan lambar girmamawa, a taron da aka gudanar a ɗakin taro na Gidan Gwamnatin Jihar Jigawa, Shugaban Ƙungiyar Alhaji Adamu Attahiru Birnin Kebbi, ya yabawa Maigirma Gwamnan bisa irin ayyukan raya ƙasa da yake shimfiɗawa a jihar da kuma ƙoƙarin sa na bayyana ayyukan gwamnati ga al’uma.

Alhaji Abdullahi Attahiru yace ƙarƙashin mulkin Gwamna Muhammad Badaru, jihar Jigawa ta samu cigaba ta fannoni da dama musamman harkar noma.

A jawabin sa, a yayin da ya karɓi kyautar, Gwamna Badaru ya nuna farin cikin sa da wannan karramawa, tare da alƙawarin zai ci gaba da ayyukan raya ƙasa da kuma bunƙasa Harkokin noma domin bin sahun Shugaban Ƙasa Muhammadu Buhari.

Gwamna Badaru ya kuma yi kira ga Ƴaƴan Ƙungiyar da su cigaba da wayar kan al’uma bisa ga ayyukan raya ƙasa da Maigirma Shugaban Ƙasa Muhammadu Buhari ke yi wa ƙasar nan, tare da yaɗa manufofi domin ƙara zaɓen Maigirma Shugaban Ƙasa don cigaba da abin da ya faro.

#Rariya